Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Xixón: una seronda enllena de cultura, música y sidra

Votos

(Total de votos recibidos 0)

(Puntuación 0)

otono cultural
Los reclamos de la ciudá asturiana convencen per se. Pero Xixón tamién ufierta una montonera d’escuses pa namorar pol butiellu o pa curiar l’alma por mor del arte y la cultura. Entaína a lleer y piensa en facer les maletes de nueves pa una escapada.

Aporta setiembre y l’aire les castañes, esi vientu del sur que fai que la seronda seya a la vera del Cantábricu muncho más templada de lo esperao. Perfeuto pa esfrutar de paseos interminables pela sablera de San Llorienzo, d’atapeceres nel Puertu Deportivu, del soníu de la mar y de les gaviluetes sol Eloxu del Horizonte o d’esi aire puro y mugosu de sitios como’l Xardín Botánicu Atlánticu, Deva o La Providencia.

Seronda gastronómica

Ensin dulda, una de les grandes disculpes p’afayase na Villa de Xovellanos ye la so gastronomía y, cómo non, la sidra. Pola so situación, a la vera’l mar Cantábricu y a tiru piedra de los Picos d’Europa, en Xixón ye posible esfrutar de lo meyor de la mar y de la montaña, con pexes, mariscos, quesos, carne, fabes y tolos meyores productos de la perbona mesa asturiana. Na seronda la ciudá apuesta fuerte y ye un placer pa cualesquier gourmet.

Del 5 al 15 d’ochobre, Xixón engalánase y celebra con arguyu que ye la principal mancha sidrera del mundu. Nun hai meyor manera pa conocer la idiosincrasia llocal y prebar la meyor gastronomía y la meyor sidra que percorrer les sidreríes más emblemátiques de la ciudá. En Xixón de sidra participen llagares de tolos requexos d’Asturies. Cada sidrería ufierta una botella de sidra y una cazuelina o ración de creación de so. Un autobús especial percuerre toles sidreríes participantes pa poner fácil los tresllaos.

Y en payares, ye’l turnu de los pinchos. Xixón de pinchos ye’l festival gastronómicu con más participación d’España. El certame cunta con más de 120 participantes qu’ufierten el so bon facer y la so creatividá demientres 10 díes de bona gastronomía na ciudá. Un plan afayadizu que, pa que seya más redondu, coincide col Festival Internacional de Cine de Xixón.

Esto ye solo facer gana, yá que Xixón siempres tien preparáu daqué pa quien-y pruya esfrutar de los sos sabores, como Xixón Gourmet y Xixón Llambión, que funcionen tol añu, o la Ruta de la Sidra Xixón, que nestos meses presta más, yá que ye’l momentu de la mayanza. ¡Ah! Y p’avientu tamos preparando les Xornaes de la Cocina Tradicional, unes xornaes onde la fabada y los potes van ser los protagonistes.

Seronda cultural

Pero si la disculpa gastronómica nun ye suficiente pa decidise a visitar Xixón na seronda, ye preciso tomar nota de les cites culturales. Na seronda coinciden cuatro de los grandes festivales qu’acueye la ciudá, toos de sonadía na esfera cultural española: el festival de danza, el de jazz, el de cine y el de góspel. Pa tolos gustos.

Danza Xixón, del 11 al 31 d’ochobre, busca, con representaciones en dellos espacios de la ciudá, fomentar la creación, la produición y la difusión de la danza contemporánea y l’espectáculu xestual. Esti añu destaca l’espectáculu We Women, de Sol Picó, premiu nacional de danza 2016 y el proyeutu nuevu de Dance Lab Berlin, ente otros.

El Festival de Jazz de Xixón aconceya nel Teatru Xovellanos, del 9 al 12 de payares, grandes actuaciones d’esti xéneru. Esti añu, los cabezaleros del cartelu son Isaac Turienzo, Sheyla Jordan y Bill Lourance Group. Amás, Miguel Blanco va dirixir “White Noise Concert”, un conciertu pa 15 de los músicos más relevantes de les escenes folk y jazz d’Asturies, escritu esclusiva y espresamente pa estrenase en Jazz Xixón 2017.

Pero si lo tuyo ye más el celuloide, avérate a Xixón del 17 al 25, cuando la ciudá acueye la 54ª edición del Festival Internacional de Cine de Xixón. Ye una cita ineludible pa aficionaos al cine de calidá y una oportunidad de ver una montonera de películes de cine independiente, inédites n’España. Sedrán dos selmanes nes que la ciudá respira cine y les sorpreses xurden en cada requexu. Amás de la programación nes diferentes seiciones, entámense cursos sobre dellos temes venceyaos col sétimu arte, meses redondes, alcuentros colos direutores… Arriendes d’ello, tamién hai conciertos diarios y fiestes con música en direuto onde s’axunten los aficionaos al cine y les estrelles del festival.

Yá para finar la seronda, llega’l Festival de Góspel al Teatru Xovellanos. De gran tradición na ciudá, axunta a los grandes valores d’esti estilu musical. Esti añu, del 15 al 17 d’avientu, cítense en Xixón Harlem Gospel, Nola Gospel Project y The South Carolina Gospel Chorale.
Nun hai meyor manera de cargar les piles qu’averase al Cantábricu y respirar el so airiquín, respirar Xixón.
Palabras clave Turismo