Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

EL GRAN AÑU DEL CINE FRANCÉS VA TENER SONADÍA NA COMPETICIÓN DEL 55FICX

Votos

(Total de votos recibidos 1)

(Puntuación 0)

grandeur
La 55ª edición del Festival Internacional de Cine de Xixón va poner especial atención a la que ye, ensin dulda, la cinematografía más importante del nuestru continente. El cine francés más actual va atopase nel FICX, nuna programación qu’axunta trabayos non vistos anteriormente de veteranos cineastes y primeros trabayos d’autores dispuestos a tomar el relevu.

Dientro de la Seición Oficial, los espectadores del FICX van poder ver la première europea de la última obra de Paul Vecchiali (Córcega, 1930), qu’estrenó l'anterior trabayu na Seleición Oficial del Festival de Cannes. Les sept déserteurs ou la guerre en vrac ye una fábula antibélica onde’l veteranu direutor vuelve a emplegar el llinguax teatral pa desenvolver un drama con sorprendentes toques d’humor. Una oportunidá nueva de rescatar a un cineasta incomprensiblemente tapecíu munchu tiempu y agora felizmente rescatáu. Tamién va formar parte de la Seición Oficial del 55FICX la ópera-rock de Bruno Dumont (Bailleul, 1958), Jeannette, l’enfance de Jeanne d’Arc, na que’l direutor d’Hors Satan reescribe la infancia de la Donciella d’Orleans al ritmu de guitarres eléctriques y de bailles espasmódicos. Dumont, al que’l FICX yá-y dedicó una retrospectiva na so 44ª Edición, va trayer la so última película a Xixón tres el so célebre pasu pela Quincena de los Realizadores del Festival Internacional de Cannes.

Dientro de los pases especiales que va ufrir esta edición del Festival, los espectadores van tener la oportunidá única de ver Grandeza y decadencia de un pequeño comercio de cine (Grandeur et décadence d'un petit commerce de cinéma), un trabayu pa la televisión del llexendariu cineasta franco-suizu Jean-Luc Godard (París, 1930), obra de calter inéditu que foi recuperada gracies al llabor de la distribuidora Capricci Cine. Col protagonismu de Jean-Pierre Léaud, Godard adelanta dalgunes de les claves, estilístiques y temátiques de títulos emblemáticos del séptimu arte, tanto propios (Histoire(s) du cinéma) como ayenos (Mulholland Drive). Xixón va ser asina’l primer llugar del nuestru país onde va vese la obra perdida d’unu de los autores más importantes de la historia del cine, y que va estrenase en sales a principios d’avientu.

Na Competición Internacional Rellumes tamién vamos tener representación francesa, nesti casu por partida triple. Asina, vamos contar con títulos como Drôles d’oiseaux, presentada na edición 2017 de la Berlinale y que xunta a la improbable pareja formada por Jean Sorel y Lolita Chammah (fía d’Isabelle Huppert) nuna historia inusual que mez el misteriu y el romance, a les órdenes d’Élise Girard (Thouars, 1974). Tamién nesta seición va presentase una de les xoyes tapecíes del pasáu Festival de Cannes, Pour le réconfort, ópera prima como direutor del actor Vincent Macaigne (París, 1978), unu de los rostros más reconocibles de la nueva fola del cine francés. La película esplora les nueves rellaciones tanto sentimentales como de clas na mocedá francesa actual, puestes n’escena con maestría cola complicidá del direutor de fotografía español Mauro Herce, del que los espectadores del FICX van recordar la so ópera prima, Dead Slow Ahead. A lo último, el cine documental galu llega a la competición de la mano de Nothingwood. La cinta, ópera prima de Sonia Kronlund y nominada a los premios EFA, sigue la pista del cineasta afganistanu Salim Shaheen, actor/direutor/productor granible con más de 100 películes na so biografía, una oportunidá d’averase al cine Z vistu con gran sentíu del humor magar la estrema situación del país afganistanu.
Palabras clave Festival de Cine, 2017